spot_img
0.8 C
Tbilisi
spot_img
Homeბიზნესიმედია & კომუნიკაციაშავ ზღვაში ინტერნეტ-კაბელის გაყვანა იგეგმება - "საქართველოს ციფრულ ჰაბად ჩამოყალიბების შანსი აქვს"...

შავ ზღვაში ინტერნეტ-კაბელის გაყვანა იგეგმება – “საქართველოს ციფრულ ჰაბად ჩამოყალიბების შანსი აქვს” | BM.GE

შავ ზღვაში კიდევ ერთი დიდი პროექტის განხორციელება იგეგმება. ზღვის ფსკერზე საქართველოსა და რუმინეთის დამაკავშირებელი ელექტროკაბელი უნდა აშენდეს. მაღალი ძაბვის გადამცემი კაბელის და ოპტიკურ-ბოჭკოვანი ინტერნეტკაბელის ეკონომიკური დასაბუთებისთვის კვლევა ჩატარდება, რომელიც სახელმწიფო ელექტროსისტემის დაკვეთით და მსოფლიო ბანკის დაფინანსებით განხორციელდება.

თუ პროექტი განხორციელდა, ეს ნიშნავს, რომ 1 195 კილომეტრის სიგრძის კაბელი საქართველოდან რუმინეთს უნდა დაუკავშირდეს. მსოფლიო ბანკის თანახმად, პროექტის შესახებ წინასწარი შეფასება უკვე ჩატარებულია, რომლის მიხედვითაც, მსგავსი ურთიერთკავშირის არსებობა როგორც რუმინეთის, ასევე სამხრეთ კავკასიის ქვეყნების ენერგეტიკულ სისტემასა და ეკონომიკაზე დადებითად აისახება.

მცირე და საშუალო ტელეკომოპერატორების ასოციაციის ხელმძღვანელი უჩა სეთური ამბობს, რომ რუმინეთთან დამაკავშირებელი ახალი, ოპტიკურ-ბოჭკოვანი კაბელის მშენებლობა საქართველოს აძლევს შანსს, გახდეს რეგიონის ციფრული ჰაბი. მისი თქმით, იმის გათვალისწინებით, რომ მსოფლიოში და საქართველოში ძალიან სწრაფად იზრდება ინტერნეტის მოხმარება, ამიტომ ინტერნეტის მიერთების დამატებითი წერტილების არსებობა, განსაკუთრებით ევროპასთან, მნიშვნელოვანია.

“ინტერნეტთან მიერთება გვაქვს ყველა მეზობელ ქვეყანასთან. ევროპასთან ჩვენი მიერთება არის ფოთი – ვარნას მიმართულებით. ასევე გვაქვს მიერთება ლარსში რუსეთთან, ოკუპანტ მეზობელთან მიერთებაა ფოთი-ნოვოროსისკის მეშვეობითაც. გვაქვს მიერთება აზერბაიჯანთან და სომხეთთან 2-2 ადგილას, ასევე თურქეთთან სარფსა და ვალეში. ანუ შეიძლება ვთქვათ, რომ მიერთების შესაძლებლობები გამოყენებულია”,- აცხადებს უჩა სეთური.

მისივე თქმით, ინტერნეტის, როგორც სტრატეგიული ობიექტის, მნიშვნელობაზე აშშ-ის სახელმწიფო დეპარტამენტიც საუბრობს. აქედან გამომდინარე უჩა სეთური წყაროების დივერსიფიკაციაზე აკეთებს აქცენტს. მისი განცხადებით, უმნიშვნელოვანესია, რომ რუსეთთან მიერთებები მაქსიმალურად შემცირდეს, ხოლო ტრანზიტმა, რომელიც ჩრდილოელ მეზობელზე გადიოდა, გადმოინაცვლოს საქართველოზე.

“ჩვენ ვამბობთ, რომ ჩვენი გეოგრაფიული მდებარეობა გვაძლევს საშუალებას, რომ სომხეთისა და აზერბაიჯანის მეშვეობით გავატაროთ ინტერნეტ ტრაფიკები, მათ შორის ინდოეთის, ჩინეთის მიმართულებით”,- აცხადებს უჩა სეთური.

მისივე თქმით, კაბელის საქართველოზე გავლით ქვეყანას ეხსნება შესაძლებლობა უმსხვილესი კომპანიები შემოვიდნენ, რომლებიც ახლა თურქეთში არიან წარმოდგენილი.

სტატია სრულად – BM.GE

გააზიარე 👇

spot_img
BM.GEhttp://www.bm.ge
Business Media Georgia - წარმოადგენს მულტიმედიურ რესურსს, რომელიც თავს უყრის ახალ ამბებს ბიზნესისა და ეკონომიკის შესახებ, როგორც გადაცემებში, ისე - ონლაინგამოცემაში.
spot_img

ახალი სტატიები

ბიზნეს სიახლეები