რედაქტორის სვეტი

   2009-ის აპრილმა დაძაბული მოლოდინების, გადაკეტილი ქუჩებისა და ნაცემი ადამიანების ფონზე ჩაიარა. მაისი, როგორც ჩანს, ასეთივე იქნება.
ზოგადად, ასეთი იქნება საქართველოს გზა დემოკრატიისკენ იქამდე, ვიდრე ხალხი და ხელისუფლება უნისონში არ დაიწყებენ ცხოვრებას. “შუბი ხალათში არ იმალება”, - დიდი ხნის წინათ ნათქვამი ეს სიტყვები ამ აპრილმაც ბევრჯერ გამახსენა. საქართველოში არსებობს რეალური პრობლემები და მათი დანახვა, მოგვარება ხელისუფლების პირდაპირი მივალეობაა. რაც უფრო შორს გადადებს ამ საქმეს ხელისუფალი, მით უფრო შორი გახდება ხალხისთვის და შედეგიც ლოგიკური დადგება, - მისი შეცვლით, დღის წესრიგში. დემოკრატიული ქვეყნები ასე ცხოვრობენ და ასე უნდა ვიცხოვროთ ჩვენც, რადგან, 2003 წლის გიორგობას ერთმანეთს სწორედ დემოკრატიულ ქვეყნის შენების პირობა მივეცით.
  ყველაზე ზუსტად და ყველაზე ფაქიზად იმაზე, თუ როგორ უნდა ვიცხოვროთ, ამჯერადაც საქართველოს კათოლიკოს-პატრიარქმა გვითხრა. ილია II სააღდგომო ეპისტოლეს, რომელიც, ჩვენი პატრიარქის მიერ ბოლო ხანებში დაწერილი ეპისტოლეების თუ წარმოთქმული სიტყვების მსგავსად, ქვეყნაში შექმნილი პრობლემების გადაჭრის კონკრეტულ გზებზე მიუთითებს, სრული სახით გთავაზობთ. სხვა ყველაფერი, რაც მაისის ნომერშია, კიდევ ერთხელ შეგახსენებთ ქართულ რეალობას: არსებულ საფრთხეებს, მოსაგვარებელ პრობლემებს, გამოსაყენებელ შესაძლებლობებს და იმასაც, რომ ქართველებს კარგად გამოგვდის ყველაფერი, რასაც სერიოზულად მოვეკიდებით, მთავარია – მოვინდომოთ. მთავარია, დავრწმუნდეთ, რომ ის, რასაც ვაკეთებთ, მართალი საქმეა და ყველაფერი სწორი გზით წავა, ყველაფერი კარგად იქნება. 
  
    კეთილი სურვილებით,
    მაკა ჯაიანი